Ada saurang raja nang katuju lawan sayembara. Sampai-sampai cara mancariakan laki gasan anaknya nang langkar pun sidin maadaakan sayembara. Isi sayembaranya yaitu siapa nang wani batajun ka kolam buhaya ampun raja nang singhaja lawas kada dibari makan, lalu kawa naik dengan selamat akan dikawinakan lawan anaknya.
Sampai harinya kolam buhaya ampun raja tadi di dindingi sakulilingan kaya tong edan. Siapa nang handak umpat sayembara bulih batimbai mulai di atas. Kada usah mandaftar badahulu.
Sabalum acara dimulai prajurit istana manimbai saikung hayam mati kadalam kulam. Babaya sampai di banyu hayam itu sudah habis dilahap buhaya-buhaya nang lapar itu. Hinip panonton nang malihat mulai di atas.
Agung dibunyiakan partanda sayembara dimulai. Kada lawas maju lalakian nang ganal awaknya, awak hibak lawan tato, pakai babasal. Amun malihat potongan wani mamakan ka buhaya. Lalakian tadi langsung batimbai ka kolam. Sampai di parmukaan banyu kolam langsung manyambur darah. Awaknya dirabutakan buhaya nang kalaparan. Imbah itu hinip kada talihat buriniknya lagi. Panonton tegang, kadada nang kawa basuara.
Lima manit, sampai sapuluh manit imbah itu sunyi, kadada nang waninya batimbai. Parahatan susunyiannya "Cabuuuuuuurrrr" bunyi urang batimbai ka banyu. Sabarataan manjanguk ka dalam kolam. Sakalinya saurang lakian bakunyung ka pinggir kolam. Lakian itu awaknya kurus, ditiup gin rabah awaknya. Akhirnya inya selamat sampai ka pinggir kolam. Malihat itu langsung para wartawan mandatangi handak mawawancarai si laki-laki tadi. "Umai harat banar pian lah. Sadikit-dikit kadada luka. Kalau boleh tahu ilmu apa nang pian pakai sampai buhaya kada baliur?" ujar wartawan manakuni. "Ilmu napanya! Bungul banar!!.. Siapa nang manjuhung aku mulai di balakang tadi?"
Wartawan: Haaa!?!?#*"
